ՄԱԿ-ի Ընդհանուր Ժողովին Ընթացքին Խօսք Առնելով`. «Մեր Հիւլէական Ծրագիրը Խաղաղ Նպատակներու
Համար Է» Ըսաւ Ռուհանի
Իրանի նախագահ Հասան Ռուհանի ՄԱԿ-ի Ընդհանուր ժողովի 68-րդ նստաշրջանին բացման ընթացքին
խօսք առնելով յայտնեց, որ իր երկիրը աշխարհի մէջ ապահովութեան որեւէ սպառնալիք չի ներկայացներ,
այլ աշխարհի մէջ ապահովութիւնը կը ներկայացնէ եւ միայն միջազգային արդարութեան ու խաղաղութեան
կը ձգտի: «Իրանի մէջ գոյութիւն ունի չափաւորականութեան բնորդ մը, որ վերջին ընտրութիւններուն
եւ իշխանութեան հանդարտ կերպով փոխանցման ճամբով ի յայտ եկաւ»: Ան ըսաւ, որ Իրանի
դէմ հաստատուած պատժամիջոցները մարդկային հիմնարար սկզբունքներուն կը հակասեն` նշելով,
որ «մենք պատրաստ ենք առանց արտաքին ճնշումի մեր հիւլէական ծրագիրին խաղաղ բնոյթը փաստելու
եւ աշխատանք պիտի տանինք այդ ծրագիրին նկատմամբ որեւէ մտավախութիւն փարատելու»: «Մենք
Ամերիկայի հետ մեր տարակարծութեան լուծման ծիրի մը կրնանք հասնիլ, եթէ ան ճնշում բանեցնելէ
դադրի», ըսաւ Իրանի նախագահը: Ան պատրաստակամութիւն յայտնեց փոխադարձ վստահութեան գոյացման
համար գործակցելու: «Զանգուածային քանդումի զէնքերը, ներառեալ` հիւլէականը, մեր բառարանին
մէջ գոյութիւն չունին», նշեց Ռուհանի: Ան ըսաւ, որ «կ՛ուզենք աշխատանք տանիլ Սուրիոյ
եւ Պահրէյնի մէջ խաղաղութեան հաստատման համար, իսկ բռնարարքները տագնապները չեն լուծեր»: